جواب حبيبي اللي وصلني كان سطر كلام

حروفه تايهة بيسألني في عتاب وملام

بيقول انت صحيح نسيتني زي الأيام

كتبت له الرد سريعا وبعته أقوام

أخي حبيب عمري الغالي بعد السلامات

سامحني بعدك نساني معني الكلمات

لكن بتخطر علي بالي كل الأوقات

وبصحي علي الذكري يوماتي وعليها ببات

ياصاحبي انا كل مشاعري عايشه وحساك

انت الوحيد اللي لا يمكن ابدا أنساك

انا انسي ألعن ايامي وليالي اساك

ولا انسي تعقيدك في صبحك ومساك

ده انا اللي طول عمري ضحية لقمك ياخبيث

طول عمرك حسود وظالم وأناني تربية ابليس

وياما شكتني مقالب ياخبيث وكل عمله بتعمله وتطلع منها بيس

ولا الفلوس اللي واخدها تسليم بالإيد واديتني شيك وانت ما لكش في البنك رصيد

سنين حياتي اللي قضيتها وياك في آلام

ساعة ما تخطر علي بالي..بسهر ما بنام

انساك ده مستحيل ابدا يحصل ولا في الأحلام

أنساك ده كلام انساك ياسلام