من الإسكندرية إلى سيوة، 600 كيلومتر قطعتها 8 فتيات بالاسكوتر فى الطريق الصحراوى، بهدف كسر حاجز الخوف والقيود المجتمعية، ونشر ثقافة استخدام البنات للدراجات كوسيلة أساسية وسهلة وكذلك رخيصة.

فى حماية 13 شاباً من هواة ركوب الدراجات، سافرت الفتيات باستخدام الإسكوتر، فى تحدٍّ جديد حرصن من خلاله على نشر رسالة محددة: «البنت تقدر تسافر لوحدها ولمسافة طويلة وعلى الإسكوتر، رغم إن السفر بالدراجة بيكون مرهق جداً، لكنه ممتع وبنحس فيه بالحرية كأننا طايرين»، حسب شاهندة أيمن، إحدى المشاركات فى الفعالية، مؤكدة أنهن شجعن صديقاتهن على خوض التجربة: «معانا رجالة بتسافر دايماً على الإسكوتر، دعمونا عشان دى أول سفرية لينا لمسافة طويلة عشان لو حصل عطل أو اتعرضنا لأزمة وإحنا فى الطريق»، وقامت آلاء الفحام، إحدى المشاركات، بالسفر عبر دراجة خاصة بها قامت بفحصها جيداً وارتدت زياً مناسباً للسفر: «لبست الخوذة والجوانتى عشان أبقى فى أمان».

محمود بيومى، أحد أعضاء نادى راكبى الدراجات فى الإسكندرية، الذى يرعى الرحلة، يتواصل مع بعض الشركات الخاصة بقطع غيار الإسكوتر لمساعدتهم: «بيساندونا بكاوتشات أو قطع غيار عشان لو حصل حاجة فى الطريق تبقى معانا بديل».